مذكرات مشاغب (2)

موضوع: مذكرات مشاغب (2) 2011-01-10, 10:16 pm

.

اليوم هو اليوم الأول في الفصل الدراسي, الساعة السابعة صباحا والجو مشمس وجميل وأصوات عصافير الجنة تدب في أرجاء البيت
( كل أولاد الحارة بلعبوا عنا ) استيقظت نشيطا ولا اشعر بالجوع على غير عادة رغم أني لم أتناول عشائي الليلة الماضية
( يمكن من الفرحة نسيت الجوع ).
ارتديت ملابسي وتعطرت ( من عطر اخوي كمان مرة ) وأخذت عدة الدراسة معي ( باكيت دخان , نظارة شمسية تعلق على القميص فقط , قلم للزينة وغالبا فاضي مشان ما يخرب القميص لاني بدي ارجع القميص لصاحبه ههههه ) .
وقبل أن اخرج من باب البيت توجهت إلى أمي قائلا ( يما أرضي علي أنا طالع ) , فقالت ( روح يما الله يرضى عليك دنيا وآخره )
ارتفعت معنوياتي وزاد نشاطي . ولكن قبل أن أتوجه إلى الباب سألتني أمي بتعجب ( وين رايح يما على الصبح ؟؟!!!)
فأجبت ( يما رايح للكلية اليوم أول يوم ) فقالت مستغربة ( ليش يما هو أنت بتدريس بالكلية ؟؟ !! ) فأجبت ( يما انتي جاي جديد عالبيت
ابنك بالكلية وأنتي مش عارفة على كل حال راح انشر الغسيل ادعيلي بالتوفيق ) فقالت ( الله يوفقك ) .
عملت حالي أوف لاين وتخطيت الموقف وعملت جاهدا لأبقى بمزاج جيد استعدادا لأول يوم دراسي وكلي طموح وأمل بان ابدأ حياة
الكلية بشكل مختلف عن المدرسة وبنمط حياتي جديد .
وصلت باب الكلية وأنا امشي ببطء شديد ( بتلكع بالمشي يعني ) ولقيت حراس الأمن وقفوا كل الطلاب وما يدخلوا إلا إلي معه بطاقة
جامعية , نطيت وسط الطابور وأشهرت البطاقة الجامعة في وجه الحراس ( مثل مزورو لما رفع سيفه قدام الأشرار خخخخخخخ)
المهم دخلت ووصلت للساحة الرئيسية بالجامعة ( السكوير على رأي الطلاب المثقفين ) شفت الطلاب والطالبات كل العالم يتعرفوا على
بعض, كل ما امشي جنب جماعة بسمع نفس الأسئلة ( أنت من أي مدرسة ؟؟ , شو معدلك بالتوجيهي (الثانوية العامة) , أي تخصص
اخترت ) ومن هالاسئلة الفاضية .
وأنا بدور على أهم شي بالجامعة ولفيت لما دخت وما بدي اسأل حدا ( كال ما بدي أبين سنفور هههه) وأخيرا لقيتها بعد ما دخت وأنا
بدور. ( الكافتيريا المقر الرئيسي للمدخنين ) , فنجان قهوة وسيجارة نستني إني بالكلية طبعا ممكن أنا السنفور الوحيد إلي كان هناك لان
كل السنافر ( الطلاب الجدد ) كانوا يبحثون عن قاعاتهم وينظرون إلى برامجهم الدراسية , وأنا خارج التغطية .
وبينما أنا جالس على الطاولة أناظر الطلاب بمقلتي ( بس كيف مقلتي حلوة صح هههههههه ) وإذ بشاب شكله أهبل بالفطرة يقترب مني
وأنا أحدث نفسي وأقول ( يا رب ما يتعرف علي شكله أهبل ) اقترب الشباب الذي والعلم عند الله كان يرتدي بلوزة جده الأكبر .
فسالني الشباب هل من احد معك .. فأجبت ( لا والله ما معي حدا بس احتمال ييجي وأنا ما بستناه يا ريت تشوف طاولة ثانية ) يعني حل
عني بأدب . فضحك ضحكة غبية جدا لافتة للأسماع والأنظار وقال أنا اسمي نهاد محمد علي وبدرس تخصص ميكانيكا سنة أولى
وأنا من فضيحة الضحكة وهبل المنظر والاسم الثلاثي جعلني لا اقدر على التملص من قول تفضل اجلس.
فبدأ نهاد بطرح الأسئلة الغبية الثلاث السابق ذكرها , وأنا محاولا تجنب كل الأسئلة والتي وصل عددها إلي مائتي سؤال في الساعة
ضابطا أعصابي محاولا كبح جماح الغضب في داخلي .
وبعد عدة محاولات من نهاد لجعلي أتكلم معه ولم أكن أصلا قد أعرته أي اهتمام فتارة انظر إلى كاس القهوة ( ركزوا كاس قهوة عشان
الواحد يمخ مخ ) وتارة اتلفت حولي علني أجد من ينقذني من حقل الغباء الموجود أمامي . طال جلوسي وطالت أسئلته وقد باءت كل
محاولاتي بالفشل في جعل هذا النهاد ( يسكت و يحل عني ) وفجأة نظرة إلى يده وهي تمتد إلى يدي وهو واقف في ازائي ( ازائي =
جانبي , بس مشان الحنكة اللغوية هههههه ) وأنا أقول في نفسي ( الولد هاد شكله مش مزبوط )
فقال لي ( يلا نروح عالمحاضرة الأولى عنا هلء محاضرة لغة عربية ) فقلت له بصوت يملئه الاستهزاء والتعجب ( بتقدر تترك ايدي
وتحكي لي بلسانك . أنت بدك تقطعني الشارع ؟ ) لم يتأثر بنبرة صوتي ولا بكلامي ولم يتوانى أو يتزحزح مقدار أنمله ( أنمله = يعني
يعني دوروا عليها بالجوجل هههه ) .
فضطرني الموقف أن أكون لطيفا مرة أخرى وان اذهب معه رغم محاولتي الهروب منه بحنكة ( معلش اسبقني أنت وأنا رايح لبيت
الراحة وبنلتقى بالقاعة ) فأصر كل الإصرار أن ينتظرني على الباب إلى أن اخرج بالسلامة ( على أساس جاي من المطار أنا ).
بقول في نفسي يا ربي كنت ادعي تبعتلي بنت ولو بدها تسأل بس بعتلي نهاد اسم بنت وشكل بلوزة غبية على واحد غبي .
طلعت من المطار ولقيت مين يا حزركم عالباب بستنى .............. نهاد طبعا
بس كان يبتسم ابتسامة خلتني اكره إني طالب بالكلية ( الابتسامة = مرة ببين أسنانه ومرة بخبيهم ) ولما شافني خرجت من الباب
نط أمامي وبحكيلي أحزر شو صار معي يا مان ؟؟؟ وأنا تكهربت من البلوزة إلي مش عارف لونها إلي نطت قدامي
فجاوبته بكل برود أعصاب وكآبه شو صار يا شطور ؟؟ ( وأنا بقول في نفسي يا رب يكون عرف انه طالب بالكلية ويغير البلوزة )
بيحكيلي اجت بنت مثل القمر وسألتني عن مبنى رقم 6 . و جاوبتها وتعرفت عليها هي طالبة تصميم داخلي ( ديكور يعني )
وأنا أكنه واحد ضربني كف بحكيله هي سألتك ولا أنت عرضت خدماتك مثل ما بتعمل معي هلء .
فأجاب لا يا مان هي إلي اجت لوحدها . بحكيله بتعرف لو هيك صار معي كان روحت معها وتركتك ومش بعيد اسكر باب المطار عليك
من برا . ضحك ضحكة أكدت لي انه عنده فرط في هرمون الغباء ولازمه علاج فوري إما كف أو شبشب على صباحه .
طنشت الموقف وتابعنا المسير نحو القاعة وطوال الرحلة الى القاعة التي تبعد 5 دقائق عنا سمعت منه ما يقارب 120 قصة رتيبة مملة
لا يمكن مسحها من ذاكرتي إلا بعمل فورمات لمخي ا وان اقطع راسي .
وصلنا القاعة وقد كان دخل على وقت المحاضرة اقل من دقيقتين حين قمنا بقرع الباب والاستئذان للدخول من الدكتور الذي يبدو عليه
الكبر والتسلط والسيطرة التامة على المحاضر , ونظرت مسرعا إلى جمهرة الطلبة الجالسين والذي يفوق عددهم الثمانين طالبة وطالبة
فنظر الدكتور إلينا نظرة يملئها الشر والغضب واجاب محذرا ( هذه آخر مرة سيدخل فيها طالب بعدي إلى المحاضر )
لم تفيدني الجرأة التي أتمتع فيها في هذا الموقف خاصة وان جمهرة الطلبة صامتين ناظرين إلينا ( مركزين علينا ) .
فبدا الدكتور بالكلام سائلا إيانا.

يتبع

..........
....

موضوع: رد: مذكرات مشاغب (2) 2011-01-10, 10:48 pm

كتير حلوه وخاصه صديقك نهاد طفره هاد .......
بس لا طول علينا بالحلقه الجايه

موضوع: رد: مذكرات مشاغب (2) 2011-01-11, 1:00 pm

ههههههههه

رائعة جدا اخي مانشستر

عم بنستنى بقية القصة لا تطول علينا لانك شوقتنا نعرف شو اخرنها مع نهاد

ودمت في رعاية الله

موضوع: رد: مذكرات مشاغب (2) 2011-01-12, 1:36 am

مشكور أخي مانشستر على أسلوب الطرح الجميل في سرد القصص المشوقة للغاية .

مع تصوير لواقع مجتمعنا في الغالب

يعني العطر من أخوك والقلم فاضي طيب والقميص كمان مستعار ليش هذا لبرستيج المزيف

لا تتأخر علينا بالجزء الثالث

نحن ننتظر بتشوق

موضوع: رد: مذكرات مشاغب (2) 2011-01-12, 2:25 am

مشكورين على مروركم نورتوا وشكرا على التشجيع

موضوع: رد: مذكرات مشاغب (2) 2011-01-12, 11:57 am

الاستاذ ما نشستر

ان للتميز والتألق طرق وفن

فلقد اثبت بطرحك قمة التالق و التميز

فقد راق لي ما طرحت

اسلوبك مميز اعجبني كثيرا

وفقك الله

ننتظر الحلقة القادمة

لك كل الود والاحترام

موضوع: رد: مذكرات مشاغب (2) 2011-01-12, 7:26 pm

شخصيه نهاد مضحكه جدا

ههههههههههه

ومنتظره الجزء الثالث الأعرف ماذا حدث مع الدكتور ومع نهاد

يسلمو أخي مانشستر علي الطرح الرائع للقصه

موضوع: رد: مذكرات مشاغب (2) 2011-01-14, 2:26 am

مشكوريين على الـــدعم

» مذكرات مشاغب (1)
» مذكرات مشاغب (3)