يناير 25 ...يوم لما سقط التنين ...حلوة يا ريت تأروها...

[center]لابس شيك ومعايا أمانة ....
لازم توصل للي هارانا ....
وآخر السكة طريق مسدود ...
معلش يا سيدي هي تكانة

أرجع أقول معلش صدف ....
واخد بعضي تاني وائوف ...
واقوله اخش للبيه المسئول .....
ألاقي شوية جزم بتتحدف .....

أسكت ؟؟لأ مسكتشي ؟؟؟لأ اتخرس !!!!...
لحسن كلمة بيها اتهرس ....
وفي ثانية ألاقي القفا المعتبر ....
وفتح عيني وانا بتحبس .....

ده مش حالي ده حالنا كلنا...
غم وارف وحرق في دمنا
لكن صبرنا عليهم كتير
وجيه اليوم اللي ناخد فيه حقنا

وفي يوم 25 يناير ...
الشعب نازل مبسووط وطاير ....
وقالوا سلمية سلمية
قالوا علينا فرافير بـسجاير ....

طبعا احنا مسكتناش...
عدوا يومين ومالقيناش ....
رد مسئول...فـرجعت البيت
وقلت للحاجة حضري الشاش

ما هو اصل بكرة يوم الغضب....
و انت عرفانا دايما بنضرب...
شوية قنابل على مطاك...
و فثانية كله بيتقلب...

اخدنا بعضنا و رحنا نازلين...
ماشين ولا بينا و مسالمين...
بنقول مطالبنا الشرعية...
و اتارينا ماكناش عارفين...

اتاريها غاز و رصاص مطاطى...
تيجى للظابط يقولك ها .. تموت ولا تتطاطى..
تقول له اموت فى سبيل البلد..
بلد ؟!! يقولك طيب طلقة فى راسك اهي يا واطى...

ولا خوفنا و لا جرينا من الرصاص..
مع ان فى كتير اوى ادااس...
عربيات امن و مطافى..
و كأن النمل عندهم هما الناس !!

و لحد ماجه القرار المتين...
بتاع حبيبنا عدلى التخين...
اهرب يالا و احنا مالنا !!!!؟؟؟؟
تضرب تولع بنار تنين...

الشعب استغرب ايه اللى حصل ؟!
فين قنابل النشادر و البصل...
ولا هما روحوا بيوتهم !!!
عشان هدهم تتغسل ؟؟

و ادى سجن بيولع هنا و هناك...
حرامى ينط من الشباك..
حبة سرقة على بلطجة...
على حبة عروض انتهاك...

طب فين الشرطة !! فى الخلعوووون..
طيب ... احنا حنمسك 100 مسجون ...
رجالة مش عيال العادلى..
تخلع و اهرب فى الكراكون..

و نزل الجيش و بدأنا الحظر...
و هو ده كان شؤم الفأر...
مش علينا ... على الظلمة
و قلنا يالا شوية ثأر...

طبعا احنا مهمدناش...
لجان شعبية زاى الاونااش..
و فى التحرير معتصمين...
احنا ولا توتو و لا ناش...

و يوم ورا يوم الثورة تزيد...
و كل يوم خطاب فكسان... ايه حايفيد ؟
نسيتوا الناس فى التحرير
و نسيتوا دم كل شهيد !!!

ذنبه ايه انه يموت...
هو عشان عندكو جبروت..
تضرب .. تقتل .. تخرب
عادى ماهى الايام حتفووت ....

لا و الله ماهى معدية ..
احنا فى الشارع للانهائية..
وحقهم مش حيضيع هدر
و مش حننسا مطالبنا الشرعية..

و فضلنا نهاتى 16 يوم..
لحد صاحبنا صحا من النوم..
ها ... فى حاجة !!؟
ايوة ... عايزينك من الكرسى تقوم

و الله !!! يا جمال حضر الشنطة
ها يا عزمى شرم ولا طنطا !؟؟
سوزان : برا مصر احسن
خلاص يالا على مغامرات اطلانطا

و جيه فرح مصر العظيم
اللى اتجوزت فيه حبيبها القديم..
شعبها و ناسها الطيبين.
و كان فيه ملاين المعازيم...

وكلمة بقولها لكل الناس..
حب بلادك و بأخلاص..
وخالى اللى فات ورانا
و اديها منك كل احساس..

كفاية قمع و فساد و ذل
يالا بينا انا و انت و الكل
نبنى مصر تانى من جديد..
و نطرح فيها زهر و فل

عشان نرجع ارضنا لينا بجد
عشان ميخدهاش منا حد
و نبئا اغلى شعوب العالم..
و نبئا اطول و اعظم سد.